kisi ki yaad mein shaMein jalana bhul jata hai

kisī kī yaad meñ sham.eñ jalānā bhuul jaatā hai

koī kitnā hī pyārā ho zamāna bhuul jaatā hai

kisī din be-niyāzī us kī mujh ko maar Dālegī

ḳhafā kartā hai vo lekin manānā bhuul jaatā hai

ruḳh-e-raushan pe zulfoñ kā ye girnā jān-levā hai

aur us par ye sitam dilbar haTānā bhuul jaatā hai

agar hai bhūlnā mujh ko kisī se pyaar kar lenā

nayā bantā hai jab rishta purānā bhuul jaatā hai

isī baa.is maiñ siine se use uḌne nahīñ detā

ye dil aisā parinda hai Thikānā bhuul jaatā hai

hameñ hai vasl kī ḳhvāhish magar ye kaam duniyā ke

maiñ jaanā bhuul jaatā huuñ vo aanā bhuul jaatā hai

kisī se kyā karūñ shikva mile haiñ zaḳhm hī aise

ki jin par vaqt bhī marham lagānā bhuul jaatā hai

koī aaseb hai shāyad tumhāre shahr meñ 'sānī'

yahāñ pe rahne vaalā muskurānā bhuul jaatā hai

kisi ki yaad mein shamen jalana bhul jata hai

koi kitna hi pyara ho zamana bhul jata hai

kisi din be-niyazi us ki mujh ko mar Dalegi

KHafa karta hai wo lekin manana bhul jata hai

ruKH-e-raushan pe zulfon ka ye girna jaan-lewa hai

aur us par ye sitam dilbar haTana bhul jata hai

agar hai bhulna mujh ko kisi se pyar kar lena

naya banta hai jab rishta purana bhul jata hai

isi bais main sine se use uDne nahin deta

ye dil aisa parinda hai Thikana bhul jata hai

hamein hai wasl ki KHwahish magar ye kaam duniya ke

main jaana bhul jata hun wo aana bhul jata hai

kisi se kya karun shikwa mile hain zaKHm hi aise

ki jin par waqt bhi marham lagana bhul jata hai

koi aaseb hai shayad tumhaare shahr mein 'sani'

yahan pe rahne wala muskurana bhul jata hai