kisi ki yaad thi warna kisi ke pas hi kya tha

kisī kī yaad thī varna kisī ke paas hī kyā thā

sivā ummīd ke bechārgī ke paas hī kyā thā

tamanna thī vafā thī dard-o-ġham the yās-o-hirmāñ the

kahā kis ne hamārī āshiqī ke paas hī kyā thā

zamāne kī tag-o-dau ne use bhī ḳhatm kar Daalā

ba-juz insāniyat ke aadmī ke paas hī kyā thā

junūñ kī rahbarī ne laaj rakh lī rāh-e-hastī meñ

haqīqat meñ hamārī zindagī ke paas hī kyā thā

kahāñ baaqī rahī vo bhī sabā ke gudgudāne se

hayā ke mā-sivā nāzuk kalī ke paas hī kyā thā

use manzil pe pahuñchāyā havādis ke thapeḌoñ ne

nahīñ to is shikasta zindagī ke paas hī kyā thā

ġham-o-ālām ne 'faizī' tujhe me.arāj baḳhshī hai

jahān-e-ārzū meñ bekasī ke paas hī kyā thā

kisi ki yaad thi warna kisi ke pas hi kya tha

siwa ummid ke bechaargi ke pas hi kya tha

tamanna thi wafa thi dard-o-gham the yas-o-hirman the

kaha kis ne hamari aashiqi ke pas hi kya tha

zamane ki tag-o-dau ne use bhi KHatm kar Dala

ba-juz insaniyat ke aadmi ke pas hi kya tha

junun ki rahbari ne laj rakh li rah-e-hasti mein

haqiqat mein hamari zindagi ke pas hi kya tha

kahan baqi rahi wo bhi saba ke gudgudane se

haya ke ma-siwa nazuk kali ke pas hi kya tha

use manzil pe pahunchaya hawadis ke thapeDon ne

nahin to is shikasta zindagi ke pas hi kya tha

gham-o-alam ne 'faizi' tujhe mearaj baKHshi hai

jahan-e-arzu mein bekasi ke pas hi kya tha