kisi ko bhul ke bhi apna raaz-dan na bana

kisī ko bhuul ke bhī apnā rāz-dāñ na banā

jo terā dost hai us ko adū-e-jāñ na banā

hai muḳhtasar sā fasāna hayāt-e-do-rozā

tū ranj-o-ġham kī tavīl ek dāstāñ na banā

ye ḳhāk-dāñ hai har ik chiiz hai yahāñ pāmāl

tasarrufāt-e-mah-o-ḳhur se āsmāñ na banā

jo dār-o-gīr meñ amn-o-amāñ kī ḳhvāhish hai

tū ārzū-e-navādir ko mehmāñ na banā

uḌā mazāq na tahzīb aur tamaddun kā

ḳhirad ko behuda-go dil ko be-ināñ na banā

kuchh ehtirām to lāzim hai ahd-e-pīrī kā

nazar-farosh na ho hirs ko javāñ na banā

kisi ko bhul ke bhi apna raaz-dan na bana

jo tera dost hai us ko adu-e-jaan na bana

hai muKHtasar sa fasana hayat-e-do-roza

tu ranj-o-gham ki tawil ek dastan na bana

ye KHak-dan hai har ek chiz hai yahan pamal

tasarrufat-e-mah-o-KHur se aasman na bana

jo dar-o-gir mein amn-o-aman ki KHwahish hai

tu aarzu-e-nawadir ko mehman na bana

uDa mazaq na tahzib aur tamaddun ka

KHirad ko behuda-go dil ko be-inan na bana

kuchh ehtiram to lazim hai ahd-e-piri ka

nazar-farosh na ho hirs ko jawan na bana