kisi ko humse hain chand shikwe kisi ko behad shikayaten hain

kisī ko ham se haiñ chand shikve kisī ko behad shikāyateñ haiñ

hamāre hisse meñ sirf apnī safā.iyāñ haiñ vazāhateñ haiñ

qadam qadam par badal rahe haiñ musāfiroñ kī talab ke raste

havāoñ jaisī mohabbateñ haiñ sadāoñ jaisī rifāqateñ haiñ

kisī kā maqrūz maiñ nahīñ par mire garebāñ pe haath sab ke

koī mirī chāhatoñ kā dushman kisī ko darkār chāhateñ haiñ

tirī judā.ī ke kitne sūraj ufuq pe Duube magar abhī tak

ḳhalish hai siine meñ pahle din sī lahū maiñ vaisī hī vahshateñ haiñ

mirī mohabbat ke rāz-dāñ ne ye kah ke lauTā diyā mirā ḳhat

ki bhīgī bhīgī sī āñsuoñ meñ tamām gunjalak ibārateñ haiñ

maiñ dūsroñ kī ḳhushī kī ḳhātir ġhubār ban kar bikhar gayā huuñ

magar kisī ne ye haq na maanā ki merī bhī kuchh zarūrateñ haiñ

kisi ko hum se hain chand shikwe kisi ko behad shikayaten hain

hamare hisse mein sirf apni safaiyan hain wazahaten hain

qadam qadam par badal rahe hain musafiron ki talab ke raste

hawaon jaisi mohabbaten hain sadaon jaisi rifaqaten hain

kisi ka maqruz main nahin par mere gareban pe hath sab ke

koi meri chahaton ka dushman kisi ko darkar chahaten hain

teri judai ke kitne suraj ufuq pe Dube magar abhi tak

KHalish hai sine mein pahle din si lahu main waisi hi wahshaten hain

meri mohabbat ke raaz-dan ne ye kah ke lauTa diya mera KHat

ki bhigi bhigi si aansuon mein tamam gunjalak ibaraten hain

main dusron ki KHushi ki KHatir ghubar ban kar bikhar gaya hun

magar kisi ne ye haq na mana ki meri bhi kuchh zaruraten hain