kisi ko kuchh kisi ko kuchh batate

kisī ko kuchh kisī ko kuchh batāte

vo miltā to usī ko kuchh batāte

hamārī baat jo suntī vo dil se

to ham bhī be-dilī ko kuchh batāte

agar hote dar-o-dīvār apne

dar-o-dīvār hī ko kuchh batāte

hamīñ jaage nahīñ is raat varna

sitāre kyoñ kisī ko kuchh batāte

hamārī ham-zabāñ thī rāzdāñ thī

magar kyā ḳhāmushī ko kuchh batāte

khulā dahlīz se ahvāl ghar kā

darīche kyoñ galī ko kuchh batāte

hameñ mā'lūm hī kuchh kab thā 'ġhā.er'

jo ham is zindagī ko kuchh batāte

kisi ko kuchh kisi ko kuchh batate

wo milta to usi ko kuchh batate

hamari baat jo sunti wo dil se

to hum bhi be-dili ko kuchh batate

agar hote dar-o-diwar apne

dar-o-diwar hi ko kuchh batate

hamin jage nahin is raat warna

sitare kyon kisi ko kuchh batate

hamari ham-zaban thi raazdan thi

magar kya KHamushi ko kuchh batate

khula dahliz se ahwal ghar ka

dariche kyon gali ko kuchh batate

hamein ma'lum hi kuchh kab tha 'ghaer'

jo hum is zindagi ko kuchh batate