kisi ko kya agar jaib-o-gareban par hansi aai

kisī ko kyā agar jaib-o-garebāñ par hañsī aa.ī

ki mujh ko ḳhud mire hāl-e-pareshāñ par hañsī aa.ī

kisī ke sheva-e-be-e'tinā.ī par lahū royā

kisī kī pursish-e-hāl-e-pareshāñ par hañsī aa.ī

milā manzil-ba-manzil kuchh na juz āġhāz-e-manzil ke

ma.āl-e-justajū-e-umr-e-jaulāñ par hañsī aa.ī

kabhī jab māvarā-e-ālam-e-imkāñ nazar pahūñchī

bahut kotāh-dāmānī-e-imkāñ par hañsī aa.ī

sharāb-e-zindagī kā āḳhirī ghūñT uf are tauba

kahāñ nākāmī-e-tadbīr-e-insāñ par hañsī aa.ī

haqīqat dīn-o-duniyā kī samajh meñ aa ga.ī jis dam

na pūchho kitnī bahs-e-kufr-o-īmāñ par hañsī aa.ī

havā itnī thī lekin chand sāñsoñ kā thā afsāna

hayāt-o-maut ke rangīn unvāñ par hañsī aa.ī

ulū-e-fikr ne har auj ko zer-e-nazar paayā

nigāh-e-ġhaur kar har rāz-e-pinhāñ par hañsī aa.ī

kisi ko kya agar jaib-o-gareban par hansi aai

ki mujh ko KHud mere haal-e-pareshan par hansi aai

kisi ke shewa-e-be-e'tinai par lahu roya

kisi ki pursish-e-haal-e-pareshan par hansi aai

mila manzil-ba-manzil kuchh na juz aaghaz-e-manzil ke

maal-e-justaju-e-umr-e-jaulan par hansi aai

kabhi jab mawara-e-alam-e-imkan nazar pahunchi

bahut kotah-damani-e-imkan par hansi aai

sharab-e-zindagi ka aaKHiri ghunT uf are tauba

kahan nakaami-e-tadbir-e-insan par hansi aai

haqiqat din-o-duniya ki samajh mein aa gai jis dam

na puchho kitni bahs-e-kufr-o-iman par hansi aai

hawa itni thi lekin chand sanson ka tha afsana

hayat-o-maut ke rangin unwan par hansi aai

ulu-e-fikr ne har auj ko zer-e-nazar paya

nigah-e-ghaur kar har raaz-e-pinhan par hansi aai