kisi maqam se guzre nahin phisalta hai

kisī maqām se guzre nahīñ phisaltā hai

jo haq-parastoñ ke naqsh-e-qadam pe chaltā hai

sunā hai karne lagā hai vo raushnī taqsīm

mire charāġh se jis kā charāġh jaltā hai

fazā-e-zīst pe chhā.ī huī hai tārīkī

bahut dinoñ se ye manzar nahīñ badaltā hai

bisāt itnī kahāñ hai jo chheḌeñ sūraj ko

in āñdhiyoñ kā diyoñ par hī zor chaltā hai

tumhāre zulm pe chup huuñ ye zarf hai merā

ubalne ko to mirā bhī lahū ubaltā hai

hameñ na kījiye majbūr hijratoñ ke liye

daraḳht apnā Thikāna nahīñ badaltā hai

ḳhudā hī hāmī-o-nāsir hai us kā ai 'ālam'

jo khā ke bārhā Thokar nahīñ sañbhaltā hai

kisi maqam se guzre nahin phisalta hai

jo haq-paraston ke naqsh-e-qadam pe chalta hai

suna hai karne laga hai wo raushni taqsim

mere charagh se jis ka charagh jalta hai

faza-e-zist pe chhai hui hai tariki

bahut dinon se ye manzar nahin badalta hai

bisat itni kahan hai jo chheDen suraj ko

in aandhiyon ka diyon par hi zor chalta hai

tumhaare zulm pe chup hun ye zarf hai mera

ubalne ko to mera bhi lahu ubalta hai

hamein na kijiye majbur hijraton ke liye

daraKHt apna Thikana nahin badalta hai

KHuda hi hami-o-nasir hai us ka ai 'alam'

jo kha ke barha Thokar nahin sanbhalta hai