kisi mast-e-KHwab ka hai abas intizar so ja

kisī mast-e-ḳhvāb kā hai abas intizār so jā

ki guzar ga.ī shab aadhī dil-e-be-qarār so jā

ye nasīm ThanDī ThanDī ye havā ke sard jhoñke

tujhe de rahe haiñ lorī mire ġham-gusār so jā

ye tirī sadā-e-nāla mujhe muttahim na kar de

mire parda-dār so jā mire rāz-dār so jā

mujhe ḳhuuñ rulā rahā hai tirā dam-ba-dam taḌapnā

tire ġham meñ aah kab se maiñ huuñ ashk-bār so jā

abhī dhān-pān hai to nahīñ āshiqī ke qābil

ye tapish kā aah sheva na kar iḳhtiyār so jā

na taḌap zamīñ pe zālim tujhe god meñ uThā luuñ

tujhe siine se lagā luuñ tujhe kar luuñ pyaar so jā

tujhe jin kā hai tasavvur are mast-e-jām-e-ulfat

unhīñ añkhḌiyoñ ke sadqe mire bāda-ḳhvār so jā

tujhe pahlā sābiqa hai shab-e-ġham burī balā hai

kahīñ mar-miTe na zālim dil-e-be-qarār so jā

kisi mast-e-KHwab ka hai abas intizar so ja

ki guzar gai shab aadhi dil-e-be-qarar so ja

ye nasim ThanDi ThanDi ye hawa ke sard jhonke

tujhe de rahe hain lori mere gham-gusar so ja

ye teri sada-e-nala mujhe muttahim na kar de

mere parda-dar so ja mere raaz-dar so ja

mujhe KHun rula raha hai tera dam-ba-dam taDapna

tere gham mein aah kab se main hun ashk-bar so ja

abhi dhan-pan hai to nahin aashiqi ke qabil

ye tapish ka aah shewa na kar iKHtiyar so ja

na taDap zamin pe zalim tujhe god mein uTha lun

tujhe sine se laga lun tujhe kar lun pyar so ja

tujhe jin ka hai tasawwur are mast-e-jam-e-ulfat

unhin ankhDiyon ke sadqe mere baada-KHwar so ja

tujhe pahla sabiqa hai shab-e-gham buri bala hai

kahin mar-miTe na zalim dil-e-be-qarar so ja