kisi ne kaise nibhai hai aasman se na puchh

kisī ne kaise nibhā.ī hai āsmāñ se na pūchh

na pūchh tā.ir-e-gum-karda-āshiyāñ se na pūchh

sahar bajā-e-ḳhud ik dāstāñ na ho jaa.e

hikāyat-e-shab-e-rafta mirī azaañ se na pūchh

tire jamāl ko mahshar samajh rahe haiñ log

umaD ke aa.ī hai ḳhilqat kahāñ kahāñ se na pūchh

javāb aur to mil jā.eñge sabhī lekin

mirā qusūr hī arbāb-e-do-jahāñ se na pūchh

lagā nuqūsh-e-qadam kā surāġh aap zarā

ye baaġh kis ne ujāḌā hai bāġhbāñ se na pūchh

jo ḳhush-bayāñ haiñ sunā deñge yuuñ bhī sab ahvāl

jo be-zabāñ kā fasāna hai be-zabāñ se na pūchh

agarche ishq hai puure vajūd kā dushman

magar jo dil pe guzartī hai nīm-jāñ se na pūchh

har ik nigāh pe khultā nahīñ vo dar 'rāhīl'

udhar kā rāsta sālār-e-kārvāñ se na pūchh

kisi ne kaise nibhai hai aasman se na puchh

na puchh tair-e-gum-karda-ashiyan se na puchh

sahar baja-e-KHud ek dastan na ho jae

hikayat-e-shab-e-rafta meri azan se na puchh

tere jamal ko mahshar samajh rahe hain log

umaD ke aai hai KHilqat kahan kahan se na puchh

jawab aur to mil jaenge sabhi lekin

mera qusur hi arbab-e-do-jahan se na puchh

laga nuqush-e-qadam ka suragh aap zara

ye bagh kis ne ujaDa hai baghban se na puchh

jo KHush-bayan hain suna denge yun bhi sab ahwal

jo be-zaban ka fasana hai be-zaban se na puchh

agarche ishq hai pure wajud ka dushman

magar jo dil pe guzarti hai nim-jaan se na puchh

har ek nigah pe khulta nahin wo dar 'rahil'

udhar ka rasta salar-e-karwan se na puchh