kisi nigah kisi dil talak nahin pahunche

kisī nigāh kisī dil talak nahīñ pahuñche

rahe safar meñ jo manzil talak nahīñ pahuñche

junūñ abas hai jo maqtal talak nahīñ laayā

vo sar hī kyā haiñ jo qātil talak nahīñ pahuñche

bhañvar kī chaah meñ ġharqāb ham hue to kyā

safīne kitne hī sāhil talak nahīñ pahuñche

shikast-o-fat.h kī lazzat se tum nahīñ vāqif

abhī to tum kisī mushkil talak nahīñ pahuñche

unhīñ ko da.avā hai bastī meñ dast-gīrī kā

vo dastgīr jo saa.il talak nahīñ pahuñche

haiñ sach ke aa.ine jitne bhī TuuT jā.eñge

hamāre haath jo bātil talak nahīñ pahuñche

hamāre dard ke qisse haiñ fard-e-fardā bhī

raqam na ho sake mahfil talak nahīñ pahuñche

kisi nigah kisi dil talak nahin pahunche

rahe safar mein jo manzil talak nahin pahunche

junun abas hai jo maqtal talak nahin laya

wo sar hi kya hain jo qatil talak nahin pahunche

bhanwar ki chah mein gharqab hum hue to kya

safine kitne hi sahil talak nahin pahunche

shikast-o-fath ki lazzat se tum nahin waqif

abhi to tum kisi mushkil talak nahin pahunche

unhin ko dawa hai basti mein dast-giri ka

wo dastgir jo sail talak nahin pahunche

hain sach ke aaine jitne bhi TuT jaenge

hamare hath jo baatil talak nahin pahunche

hamare dard ke qisse hain fard-e-farda bhi

raqam na ho sake mahfil talak nahin pahunche