kisi qalam se kisi ki zaban se chalta hun

kisī qalam se kisī kī zabāñ se chaltā huuñ

maiñ tiir kis kā huuñ kis kī kamāñ se chaltā huuñ

maiñ thak gayā huuñ Thahar kar kisī samundar sā

bā-rañg-e-abr tire āstāñ se chaltā huuñ

tū chhoḌ degā adhūrā mujhe kahānī meñ

isī liye maiñ tirī dāstāñ se chaltā huuñ

jo mere siine ke baa.eñ taraf dhaḌaktā hai

usī ke naqsh-e-qadam par vahāñ se chaltā huuñ

yahāñ se chalne kā matlab to aur hai lekin

maiñ thak chukā huuñ mirī jaañ yahāñ se chaltā huuñ

ab agar chāhe to logoñ ke beach le aanā

maiñ aaj apne tire darmiyāñ se chaltā huuñ

na jaane kaise safar meñ huuñ mubtalā 'fayyāz'

vahīñ pe aatā huuñ vāpas jahāñ se chaltā huuñ

kisi qalam se kisi ki zaban se chalta hun

main tir kis ka hun kis ki kaman se chalta hun

main thak gaya hun Thahar kar kisi samundar sa

ba-rang-e-abr tere aastan se chalta hun

tu chhoD dega adhura mujhe kahani mein

isi liye main teri dastan se chalta hun

jo mere sine ke baen taraf dhaDakta hai

usi ke naqsh-e-qadam par wahan se chalta hun

yahan se chalne ka matlab to aur hai lekin

main thak chuka hun meri jaan yahan se chalta hun

ab agar chahe to logon ke beach le aana

main aaj apne tere darmiyan se chalta hun

na jaane kaise safar mein hun mubtala 'fayyaz'

wahin pe aata hun wapas jahan se chalta hun