kisi rahbar ki hai justuju kisi rahnuma ki talash hai

kisī rāhbar kī hai justujū kisī rahnumā kī talāsh hai

jo sharīk-e-mauj-e-hayāt ho usī nāḳhudā kī talāsh hai

na ruḳh-e-sanam kī hai aarzū na dar-e-ḳhudā kī talāsh hai

jo shu.ūr-e-karb atā kare usī dilrubā kī talāsh hai

maiñ jahāñ rukūñ maiñ jahāñ rahūñ tirā ġham rahe mirā ham-safar

yahī mudda.ā mirī zindagī isī mudda.ā kī talāsh hai

baḌhī jab bhī yaas kī tīrgī huiiñ gum nigāh kī manzileñ

rah-e-zindagī jo dikhā sake mujhe us ziyā kī talāsh hai

ye sukūt-e-lab ye ḳhamoshiyāñ mirī kāvishoñ kā sila nahīñ

jo diloñ ko soz-e-hayāt de usī ham-navā kī talāsh hai

na haram meñ mujh ko sukūñ milā na sanam-kade hī meñ rāhateñ

jahāñ zindagī ko yaqīñ mile mujhe aisī jā kī talāsh hai

ye na jaane kaise haiñ peshvā sar-e-rāh Duube gunāh meñ

jo chhupā le un ke uyuub sab unheñ us qabā kī talāsh hai

kisi rahbar ki hai justuju kisi rahnuma ki talash hai

jo sharik-e-mauj-e-hayat ho usi naKHuda ki talash hai

na ruKH-e-sanam ki hai aarzu na dar-e-KHuda ki talash hai

jo shuur-e-karb ata kare usi dilruba ki talash hai

main jahan rukun main jahan rahun tera gham rahe mera ham-safar

yahi muddaa meri zindagi isi muddaa ki talash hai

baDhi jab bhi yas ki tirgi huin gum nigah ki manzilen

rah-e-zindagi jo dikha sake mujhe us ziya ki talash hai

ye sukut-e-lab ye KHamoshiyan meri kawishon ka sila nahin

jo dilon ko soz-e-hayat de usi ham-nawa ki talash hai

na haram mein mujh ko sukun mila na sanam-kade hi mein rahaten

jahan zindagi ko yaqin mile mujhe aisi ja ki talash hai

ye na jaane kaise hain peshwa sar-e-rah Dube gunah mein

jo chhupa le un ke uyub sab unhen us qaba ki talash hai