kisi se apni KHabar hum wasul kya karte

kisī se apnī ḳhabar ham vasūl kyā karte

ḳhud ā.īnoñ kā bhī ehsāñ qubūl kyā karte

vo khet khet rahīñ jin kī ḳhār-dār safeñ

unhī meñ phuul the do chaar phuul kyā karte

tamām jānoñ ke dushman tamām haath hue

ye ummateñ thiiñ ab un ke rasūl kyā karte

ye koī umr thī terī mohabbatoñ vaalī

saroñ kī raakh meñ shāmil ye dhuul kyā karte

tumhāre jaisā koī naqsh har nigār meñ thā

magar the ham bhī bahut bā-usūl kyā karte

unheñ ki jin se baḌī choT kar ga.ī thī hayāt

ab aur pursish-e-ġham se malūl kyā karte

jahāñ thā toḌnā dastūr kā bhī ik dastūr

vahāñ hamāre tumhāre usuul kyā karte

ham aise log jo ḳhvāboñ ke chalne vaale the

sahar se ajr-e-masāfat vasūl kyā karte

kisi se apni KHabar hum wasul kya karte

KHud aainon ka bhi ehsan qubul kya karte

wo khet khet rahin jin ki KHar-dar safen

unhi mein phul the do chaar phul kya karte

tamam jaanon ke dushman tamam hath hue

ye ummaten thin ab un ke rasul kya karte

ye koi umr thi teri mohabbaton wali

saron ki rakh mein shamil ye dhul kya karte

tumhaare jaisa koi naqsh har nigar mein tha

magar the hum bhi bahut ba-usul kya karte

unhen ki jin se baDi choT kar gai thi hayat

ab aur pursish-e-gham se malul kya karte

jahan tha toDna dastur ka bhi ek dastur

wahan hamare tumhaare usul kya karte

hum aise log jo KHwabon ke chalne wale the

sahar se ajr-e-masafat wasul kya karte