kisi se ishq-e-dushman ka gila kya

kisī se ishq-e-dushman kā gila kyā

nahīñ jab rabt to phir mudda.ā kyā

har ik shai meñ tujhī ko dekhte haiñ

hamāre vāste achchhā burā kyā

zarūrat kyā hai samjhe kaun zāhid

ravā kyā hai yahāñ par nā-ravā kyā

use zālim samajh kar dil diyā thā

to phir ab kam-nigāhī kā gila kyā

ġham-e-duniyā kī maanā hai davā ishq

magar phir dard-e-ulfat kī davā kyā

bahut pachhtā.e tum se dil lagā kar

ba-juz ranj-o-alam ham ko milā kyā

na hogī kyā kabhī ummīd puurī

na hogā mehrbāñ vo be-vafā kyā

sabhī insān haiñ allah ke bande

jahāñ meñ āshnā nā-āshnā kyā

faqat ik dil hai vo hai nazr terī

hamāre paas hai is ke sivā kyā

nigāh-e-nāz se dil bach bhī jaa.e

magar ghāyal na kar degī adā kyā

luTā kar chal diyā ghar-bār 'hājir'

use baiThe biThā.e ye huā kyā

kisi se ishq-e-dushman ka gila kya

nahin jab rabt to phir muddaa kya

har ek shai mein tujhi ko dekhte hain

hamare waste achchha bura kya

zarurat kya hai samjhe kaun zahid

rawa kya hai yahan par na-rawa kya

use zalim samajh kar dil diya tha

to phir ab kam-nigahi ka gila kya

gham-e-duniya ki mana hai dawa ishq

magar phir dard-e-ulfat ki dawa kya

bahut pachhtae tum se dil laga kar

ba-juz ranj-o-alam hum ko mila kya

na hogi kya kabhi ummid puri

na hoga mehrban wo be-wafa kya

sabhi insan hain allah ke bande

jahan mein aashna na-ashna kya

faqat ek dil hai wo hai nazr teri

hamare pas hai is ke siwa kya

nigah-e-naz se dil bach bhi jae

magar ghayal na kar degi ada kya

luTa kar chal diya ghar-bar 'hajir'

use baiThe biThae ye hua kya