kisi se laDaen nazar aur jhelen mohabbat ke gham itni fursat kahan

kisī se laḌā.eñ nazar aur jheleñ mohabbat ke ġham itnī fursat kahāñ

uThā.eñ kisī māh-paikar hasīna ke jaur-o-sitam itnī fursat kahāñ

zamāne kī be-rahmiyoñ ke tasadduq dimāġh-e-nashāt-o-alam hī nahīñ

dil apnā kare ārzu-e-jafā yā umīd-e-karam itnī fursat kahāñ

Dubo deñ mai-e-nāb kī mastiyoñ meñ falākat ke nakbat ke ehsās ko

banā leñ kisī āmiyāna se kuuze hī ko jām-e-jam itnī fursat kahāñ

hoñ āzād-e-afkār lekin tafakkur meñ Duube hue se raheñ raat din

tabī.at kī be-vaj.h afsurdagī ke maze lūTeñ ham itnī fursat kahāñ

na maazī hamārā na mustaqbil apnā kuchh is taur se harf-e-imroz haiñ

ġham-e-dosh yā fikr-e-fardā meñ 'aḳhtar' kareñ sar ko ḳham itnī fursat kahāñ

kisi se laDaen nazar aur jhelen mohabbat ke gham itni fursat kahan

uThaen kisi mah-paikar hasina ke jaur-o-sitam itni fursat kahan

zamane ki be-rahmiyon ke tasadduq dimagh-e-nashat-o-alam hi nahin

dil apna kare aarzu-e-jafa ya umid-e-karam itni fursat kahan

Dubo den mai-e-nab ki mastiyon mein falakat ke nakbat ke ehsas ko

bana len kisi aamiyana se kuze hi ko jam-e-jam itni fursat kahan

hon aazad-e-afkar lekin tafakkur mein Dube hue se rahen raat din

tabiat ki be-wajh afsurdagi ke maze luTen hum itni fursat kahan

na mazi hamara na mustaqbil apna kuchh is taur se harf-e-imroz hain

gham-e-dosh ya fikr-e-farda mein 'aKHtar' karen sar ko KHam itni fursat kahan