kisi se raaz-e-mohabbat na aashkar kiya

kisī se rāz-e-mohabbat na āshkār kiyā

tirī nazar ke badalne tak intizār kiyā

na koī va.ada thā un se na koī pābandī

tamām umr magar un kā intizār kiyā

Thahar ke mujh pe hī ahl-e-chaman kī nazroñ ne

mire junūn se andāz-e-bahār kiyā

sahar ke Dūbte taaro gavāh rahnā tum

ki maiñ ne āḳhirī sāñsoñ tak intizār kiyā

jahāñ se terī tavajjoh huī fasāne par

vahīñ se Dūbtī nabzoñ ne iḳhtisār kiyā

yahī nahīñ ki hamīñ intizār karte rahe

kabhī kabhī to unhoñ ne bhī intizār kiyā

kisi se raaz-e-mohabbat na aashkar kiya

teri nazar ke badalne tak intizar kiya

na koi wada tha un se na koi pabandi

tamam umr magar un ka intizar kiya

Thahar ke mujh pe hi ahl-e-chaman ki nazron ne

mere junun se andaz-e-bahaar kiya

sahar ke Dubte taro gawah rahna tum

ki main ne aaKHiri sanson tak intizar kiya

jahan se teri tawajjoh hui fasane par

wahin se Dubti nabzon ne iKHtisar kiya

yahi nahin ki hamin intizar karte rahe

kabhi kabhi to unhon ne bhi intizar kiya