kisi se wada-o-paiman bhi nahin mera

kisī se va.ada-o-paimān bhī nahīñ merā

ye shahr chhoḌnā āsān bhī nahīñ merā

maiñ laḳht laḳht huā āsmāñ se laḌte hue

magar ye ḳhaak pe ehsān bhī nahīñ merā

maiñ sirf apnī hirāsat meñ din guzārtā huuñ

mire sivā koī zindān bhī nahīñ merā

sukūt-e-shab meñ tirī chashm-e-nīm-vā ke sivā

koī charāġh nigahbān bhī nahīñ merā

dharī huī koī ummīd bhī nahīñ mire paas

khulā huā dar-e-imkān bhī nahīñ merā

ye kis ke bojh ne mujh ko thakā diyā ki yahāñ

ba-juz duā koī sāmān bhī nahīñ merā

maiñ us kī ruuh meñ utrā huā huuñ aur 'shahzād'

kamāl ye hai use dhyān bhī nahīñ merā

kisi se wada-o-paiman bhi nahin mera

ye shahr chhoDna aasan bhi nahin mera

main laKHt laKHt hua aasman se laDte hue

magar ye KHak pe ehsan bhi nahin mera

main sirf apni hirasat mein din guzarta hun

mere siwa koi zindan bhi nahin mera

sukut-e-shab mein teri chashm-e-nim-wa ke siwa

koi charagh nigahban bhi nahin mera

dhari hui koi ummid bhi nahin mere pas

khula hua dar-e-imkan bhi nahin mera

ye kis ke bojh ne mujh ko thaka diya ki yahan

ba-juz dua koi saman bhi nahin mera

main us ki ruh mein utra hua hun aur 'shahzad'

kamal ye hai use dhyan bhi nahin mera