kisi suraj se hum ko ram nahin hai

kisī sūraj se ham ko ram nahīñ hai

hamārī zindagī shabnam nahīñ hai

sarishk-e-ġham kī hasrat chhoḌ ġhunche

ye koī qatra-e-shabnam nahīñ hai

salāmat nashtar-e-ġham kī siyāsat

mirā dil ḳhūgar-e-mātam nahīñ hai

jarāhat-ḳhez ye rang-e-tamannā

ye ik nashtar to hai marham nahīñ hai

gulo jabran hañso pī jaao aañsū

ye gulshan hai saf-e-mātam nahīñ hai

talavvun aur phir dast-e-junūñ kā

koī ta.amīr mustahkam nahīñ hai

tumhārā ġham bahar-sūrat hai pyārā

hameñ ehsās-e-besh-o-kam nahīñ hai

mire zaḳhm-e-jigar nāsūr ban jā

tirī taqdīr kā marham nahīñ hai

nizām-e-aql kī taqdīr 'afsar'

mizāj-e-dil abhī barham nahīñ hai

kisi suraj se hum ko ram nahin hai

hamari zindagi shabnam nahin hai

sarishk-e-gham ki hasrat chhoD ghunche

ye koi qatra-e-shabnam nahin hai

salamat nashtar-e-gham ki siyasat

mera dil KHugar-e-matam nahin hai

jarahat-KHez ye rang-e-tamanna

ye ek nashtar to hai marham nahin hai

gulo jabran hanso pi jao aansu

ye gulshan hai saf-e-matam nahin hai

talawwun aur phir dast-e-junun ka

koi tamir mustahkam nahin hai

tumhaara gham bahar-surat hai pyara

hamein ehsas-e-besh-o-kam nahin hai

mere zaKHm-e-jigar nasur ban ja

teri taqdir ka marham nahin hai

nizam-e-aql ki taqdir 'afsar'

mizaj-e-dil abhi barham nahin hai