kisi surat adu ki tark-e-ulfat ho nahin sakti

kisī sūrat adū kī tark-e-ulfat ho nahīñ saktī

hamāre haal par terī ināyat ho nahīñ saktī

kabhī tere sivā dil dūsre par aa nahīñ saktā

kisī par ab mirī maa.il tabī.at ho nahīñ saktī

banī hai mohr-e-lab paiham mohabbat us sitamgar kī

bayāñ ab dāstān-e-dard-e-furqat ho nahīñ saktī

ilāhī merā dil us sañg-dil kā dil to ban jaa.e

mirī taqdīr gar dushman kī qismat ho nahīñ saktī

ye ho saktā hai duniyā bhar ko chhoḌūñ terī ḳhātir se

raqīb-e-rū-siyah kī mujh se minnat ho nahīñ saktī

tasavvur meñ bhī tum bār-e-nazākat se nahīñ aate

tumhāre vasl kī ab koī sūrat ho nahīñ saktī

ḳhudā kī shaan hai ishq-e-adū meñ rote phirte haiñ

jo kahte the kabhī tāsīr-e-ulfat ho nahīñ saktī

ghulāyā zo.af ne aisā firāq-e-yār meñ mujh ko

tasavvur meñ bhī qaa.em merī sūrat ho nahīñ saktī

hijāb aatā hai tujh ko dushman-e-mehr-o-vafā kahte

kisī parde meñ ab terī shikāyat ho nahīñ saktī

'faroġh'-e-nayyar-e-taqdīr zau-baḳhsh-e-tamannā hai

shab-e-vasl-e-sitamgar shām-e-furqat ho nahīñ saktī

kisi surat adu ki tark-e-ulfat ho nahin sakti

hamare haal par teri inayat ho nahin sakti

kabhi tere siwa dil dusre par aa nahin sakta

kisi par ab meri mail tabiat ho nahin sakti

bani hai mohr-e-lab paiham mohabbat us sitamgar ki

bayan ab dastan-e-dard-e-furqat ho nahin sakti

ilahi mera dil us sang-dil ka dil to ban jae

meri taqdir gar dushman ki qismat ho nahin sakti

ye ho sakta hai duniya bhar ko chhoDun teri KHatir se

raqib-e-ru-siyah ki mujh se minnat ho nahin sakti

tasawwur mein bhi tum bar-e-nazakat se nahin aate

tumhaare wasl ki ab koi surat ho nahin sakti

KHuda ki shan hai ishq-e-adu mein rote phirte hain

jo kahte the kabhi tasir-e-ulfat ho nahin sakti

ghulaya zoaf ne aisa firaq-e-yar mein mujh ko

tasawwur mein bhi qaem meri surat ho nahin sakti

hijab aata hai tujh ko dushman-e-mehr-o-wafa kahte

kisi parde mein ab teri shikayat ho nahin sakti

'farogh'-e-nayyar-e-taqdir zau-baKHsh-e-tamanna hai

shab-e-wasl-e-sitamgar sham-e-furqat ho nahin sakti