kisi surat muqaddar se pareshani nahin jati

kisī sūrat muqaddar se pareshānī nahīñ jaatī

haqīqat vo haqīqat hai ki jo jaanī nahīñ jaatī

adū kī laġhv-goī ne kuchh aisā kar diyā barham

hamārī sāf-sīdhī baat bhī maanī nahīñ jaatī

hamārā rāz-e-dil hī kyā vo tum par āshkāra hai

haqīqat aap ke dil kī magar jaanī nahīñ jaatī

sar-e-maqtal taḌaptā dekh kar vo tilmilā uTThe

sitam ke baad ab un kī pashemānī nahīñ jaatī

kisī āshiq ke dil se pūchhiye sar-garmī-e-ulfat

hazāroñ mushkileñ hoñ phir bhī jaulānī nahīñ jaatī

junūn-e-ishq-e-kāmil meñ ye parvāne kī aadat hai

subūt-e-ishq-e-kāmil kī vo qurbānī nahīñ jaatī

jo sūrat koī bahr-e-ishq meñ aa.ī nazar ham ko

kuchh aisī masḳh ho jaatī hai pahchānī nahīñ jaatī

hamārī quvvat-e-bardāsht kī parvāh kyā un ko

sitam karne kī aadat hai sitam-rānī nahīñ jaatī

are 'ġham' mushkileñ to ishq kī rāhoñ meñ haiñ lekin

hai in meñ kaun kitnī saḳht gardānī nahīñ jaatī

kisi surat muqaddar se pareshani nahin jati

haqiqat wo haqiqat hai ki jo jaani nahin jati

adu ki laghw-goi ne kuchh aisa kar diya barham

hamari saf-sidhi baat bhi mani nahin jati

hamara raaz-e-dil hi kya wo tum par aashkara hai

haqiqat aap ke dil ki magar jaani nahin jati

sar-e-maqtal taDapta dekh kar wo tilmila uTThe

sitam ke baad ab un ki pashemani nahin jati

kisi aashiq ke dil se puchhiye sar-garmi-e-ulfat

hazaron mushkilen hon phir bhi jaulani nahin jati

junun-e-ishq-e-kaamil mein ye parwane ki aadat hai

subut-e-ishq-e-kaamil ki wo qurbani nahin jati

jo surat koi bahr-e-ishq mein aai nazar hum ko

kuchh aisi masKH ho jati hai pahchani nahin jati

hamari quwwat-e-bardasht ki parwah kya un ko

sitam karne ki aadat hai sitam-rani nahin jati

are 'gham' mushkilen to ishq ki rahon mein hain lekin

hai in mein kaun kitni saKHt gardani nahin jati