kisi surat na chain aae to kya ho

kisī sūrat na chain aa.e to kyā ho

tasallī aur taḌpā.e to kyā ho

adāvat to adāvat hai bahar-hāl

mohabbat bhī na raas aa.e to kyā ho

vo samjhā.eñ dilāsā deñ manā.eñ

magar dil phir bhī ghabrā.e to kyā ho

ye maanā rok deñ ham chashm-e-tar ko

tabassum ḳhuun barsā.e to kyā ho

zabāñ ko kaaT Dāleñ hoñT sī leñ

ḳhamoshī aah ban jaa.e to kyā ho

vo samjhāte raheñ aur nā-murādī

gale se baḌh ke lag jaa.e to kyā ho

ma.āz-allāh ḳhud ghar ke diye se

jo ghar meñ aag lag jaa.e to kyā ho

kahāñ kī aag aur kaisā nasheman

jo bijlī aap jal jaa.e to kyā ho

ye maanā ishq kī kuchh had nahīñ hai

jab un se ishq sharmā.e to kyā ho

masoseñ laakh ham siine meñ dil ko

unhīñ kī aañkh bhar aa.e to kyā ho

Thahoke de na yuuñ ai chashm-e-sāqī

jo paimāna chhalak jaa.e to kyā ho

ba-sad-mushkil piyā jaa.e jo aañsū

vo in palkoñ pe tharrā.e to kyā ho

ye tanhā.ī ye ronā chupke chupke

koī aise meñ aa jaa.e to kyā ho

havā se un ke dāman kī bujhe dil

sabā se phuul kumhlā.e to kyā ho

tabassum un kā le leñ mere aañsū

kiran ko os pī jaa.e to kyā ho

musībat ho to koī sabr kar le

ḳhushī ġham ban ke taḌpā.e to kyā ho

dil-e-hassās aur josh-e-mohabbat

habāb āñdhī se Takrā.e to kyā ho

vo pahlū meñ 'sarosh' aur ye qayāmat

jo vo pahlū se uTh jaa.e to kyā ho

kisi surat na chain aae to kya ho

tasalli aur taDpae to kya ho

adawat to adawat hai bahar-haal

mohabbat bhi na ras aae to kya ho

wo samjhaen dilasa den manaen

magar dil phir bhi ghabrae to kya ho

ye mana rok den hum chashm-e-tar ko

tabassum KHun barsae to kya ho

zaban ko kaT Dalen honT si len

KHamoshi aah ban jae to kya ho

wo samjhate rahen aur na-muradi

gale se baDh ke lag jae to kya ho

maaz-allah KHud ghar ke diye se

jo ghar mein aag lag jae to kya ho

kahan ki aag aur kaisa nasheman

jo bijli aap jal jae to kya ho

ye mana ishq ki kuchh had nahin hai

jab un se ishq sharmae to kya ho

masosen lakh hum sine mein dil ko

unhin ki aankh bhar aae to kya ho

Thahoke de na yun ai chashm-e-saqi

jo paimana chhalak jae to kya ho

ba-sad-mushkil piya jae jo aansu

wo in palkon pe tharrae to kya ho

ye tanhai ye rona chupke chupke

koi aise mein aa jae to kya ho

hawa se un ke daman ki bujhe dil

saba se phul kumhlae to kya ho

tabassum un ka le len mere aansu

kiran ko os pi jae to kya ho

musibat ho to koi sabr kar le

KHushi gham ban ke taDpae to kya ho

dil-e-hassas aur josh-e-mohabbat

habab aandhi se Takrae to kya ho

wo pahlu mein 'sarosh' aur ye qayamat

jo wo pahlu se uTh jae to kya ho