kisi tarah KHalish-e-arzu miTa na sake

kisī tarah ḳhalish-e-ārzū miTā na sake

tire qarīb bhī aa kar sukūn pā na sake

chaman meñ dekhe koī us kalī kī mahrūmī

jo muskurā.e to jī bhar ke muskurā na sake

usī kā sajda usī kā niyāz usī kī namāz

jo us ke dar pe jhukā kar jabīñ uThā na sake

jahān-e-ishq meñ hai inqalāb kī zāmin

vo ek aah jo dil se laboñ tak aa na sake

na pūchh us ke muqaddar kī nā-rasā.ī ko

jo aap gum ho magar phir bhī tujh ko pā na sake

ye raaz vo hai jo hoñToñ tak aa nahīñ saktā

kahāñ jhukā.ī jabīñ aur kahāñ jhukā na sake

kisī ke ġham kā rahā paas is qadar 'shāriq'

ki bhuul kar bhī mohabbat meñ muskurā na sake

kisi tarah KHalish-e-arzu miTa na sake

tere qarib bhi aa kar sukun pa na sake

chaman mein dekhe koi us kali ki mahrumi

jo muskurae to ji bhar ke muskura na sake

usi ka sajda usi ka niyaz usi ki namaz

jo us ke dar pe jhuka kar jabin uTha na sake

jahan-e-ishq mein hai inqalab ki zamin

wo ek aah jo dil se labon tak aa na sake

na puchh us ke muqaddar ki na-rasai ko

jo aap gum ho magar phir bhi tujh ko pa na sake

ye raaz wo hai jo honTon tak aa nahin sakta

kahan jhukai jabin aur kahan jhuka na sake

kisi ke gham ka raha pas is qadar 'shaariq'

ki bhul kar bhi mohabbat mein muskura na sake