kitna lamba tera safar dariya

kitnā lambā tirā safar dariyā

is ko kar thoḌā muḳhtasar dariyā

is zamīñ par hai be-gharī qismat

mar ke ban jaa.e apnā ghar dariyā

mil gayā jā ke ab samundar se

vaah tū ho gayā amar dariyā

bāñdh kar bañdh tujh ko rok liyā

ma.arka ho gayā hai sar dariyā

beach apne jo ho ga.ī haa.il

is bulandī se ab utar dariyā

terā sailāb sañg-dil hai bahut

is ghamanDī ke par katar dariyā

kuchh nasheb-o-farāz lāzim haiñ

sīdhe sīdhe na kar safar dariyā

chashm-e-'āqib' meñ aa ke Thahr zarā

yuuñ na phir ab bhī dar-ba-dar dariyā

kitna lamba tera safar dariya

is ko kar thoDa muKHtasar dariya

is zamin par hai be-ghari qismat

mar ke ban jae apna ghar dariya

mil gaya ja ke ab samundar se

wah tu ho gaya amar dariya

bandh kar bandh tujh ko rok liya

marka ho gaya hai sar dariya

beach apne jo ho gai hail

is bulandi se ab utar dariya

tera sailab sang-dil hai bahut

is ghamanDi ke par katar dariya

kuchh nasheb-o-faraaz lazim hain

sidhe sidhe na kar safar dariya

chashm-e-'aqib' mein aa ke Thahr zara

yun na phir ab bhi dar-ba-dar dariya