kitna poshida hawaon ka safar rakkha gaya

kitnā poshīda havāoñ kā safar rakkhā gayā

aane vaale mausamoñ se be-ḳhabar rakkhā gayā

aaj bhī phirtā huuñ us kī justujū meñ har taraf

kaun sī bastī meñ āḳhir merā ghar rakkhā gayā

chand mub.ham ḳhvāb āñkhoñ meñ liye phirtā huuñ maiñ

aur kyā mere liye zād-e-safar rakkhā gayā

dostoñ meñ kuchh mirī pahchān to baaqī rahe

is liye mujh meñ ajab rañg-e-hunar rakhā gayā

us hathelī par chamaktī ret ke zarre haiñ ab

jis hathelī par kabhī ganj-e-guhar rakhā gayā

nok-e-neza par kabhī tasht-e-ra.ūnat meñ kabhī

har tamāshe ke liye merā hī sar rakkhā gayā

merā apnā ḳhauf hī kyā kam thā lekin ai 'rafīq'

merī apnī zaat meñ kis kis kā Dar rakkhā gayā

kitna poshida hawaon ka safar rakkha gaya

aane wale mausamon se be-KHabar rakkha gaya

aaj bhi phirta hun us ki justuju mein har taraf

kaun si basti mein aaKHir mera ghar rakkha gaya

chand mubham KHwab aankhon mein liye phirta hun main

aur kya mere liye zad-e-safar rakkha gaya

doston mein kuchh meri pahchan to baqi rahe

is liye mujh mein ajab rang-e-hunar rakha gaya

us hatheli par chamakti ret ke zarre hain ab

jis hatheli par kabhi ganj-e-guhar rakha gaya

nok-e-neza par kabhi tasht-e-raunat mein kabhi

har tamashe ke liye mera hi sar rakkha gaya

mera apna KHauf hi kya kam tha lekin ai 'rafiq'

meri apni zat mein kis kis ka Dar rakkha gaya