kitna roka magar ruka hi nahin

kitnā rokā magar rukā hī nahīñ

aur muḌ kar to dekhtā hī nahīñ

terī chaukhaT kā bhārī darvāza

dastakeñ de ke bhī khulā hī nahīñ

mujh meñ itnā bikhar gayā hai vo

laakh chāhūñ simaT rahā hī nahīñ

sāhibā dost maan rakkhā thā

aur tū dukh meñ boltā hī nahīñ

hijr ne ḳhud bhī ye gavāhī dī

vāpsī kā to rāsta hī nahīñ

kunj-e-tanhā.ī meñ asīr-e-ishq

ḳhud se bāhar kabhī gayā hī nahīñ

ek muddat se āshnā haiñ magar

aa.ine se mukālima hī nahīñ

kis mohabbat kī baat karte ho

jis mohabbat meñ dil jalā hī nahīñ

kis ko itnā maqām dete ham

itnā achchhā koī lagā hī nahīñ

kuchh to hotā ki zindagī karte

is ta.alluq kā kuchh sila hī nahīñ

saarī duniyā shumār baiThī huuñ

ya.anī gintī meñ 'rābiya' hī nahīñ

kitna roka magar ruka hi nahin

aur muD kar to dekhta hi nahin

teri chaukhaT ka bhaari darwaza

dastaken de ke bhi khula hi nahin

mujh mein itna bikhar gaya hai wo

lakh chahun simaT raha hi nahin

sahiba dost man rakkha tha

aur tu dukh mein bolta hi nahin

hijr ne KHud bhi ye gawahi di

wapsi ka to rasta hi nahin

kunj-e-tanhai mein asir-e-ishq

KHud se bahar kabhi gaya hi nahin

ek muddat se aashna hain magar

aaine se mukalima hi nahin

kis mohabbat ki baat karte ho

jis mohabbat mein dil jala hi nahin

kis ko itna maqam dete hum

itna achchha koi laga hi nahin

kuchh to hota ki zindagi karte

is talluq ka kuchh sila hi nahin

sari duniya shumar baiThi hun

yani ginti mein 'rabiya' hi nahin