kitne ba-hosh ho gae hum log

kitne bā-hosh ho ga.e ham log

ḳhud-farāmosh ho ga.e ham log

jis ne chāhā hameñ aziyyat dī

aur ḳhāmosh ho ga.e ham log

dil kī āvāz bhī nahīñ sunte

kyā girāñ-gosh ho ga.e ham log

ham ko duniyā ne pārsā samjhā

jab ḳhatā-kosh ho ga.e ham log

pī ga.e jhiḌkiyāñ bhī saaqī kī

kyā balā-nosh ho ga.e ham log

is tarah pī rahe haiñ ḳhuun apnā

jaise mai-nosh ho ga.e ham log

shahr meñ is qadar the hañgāme

ghar meñ rū-posh ho ga.e ham log

kitne chehroñ pe aa ga.ī rañgat

jab se ḳhāmosh ho ga.e ham log

zaḳhm paa.e haiñ is qadar 'ejāz'

aaj gul-posh ho ga.e ham log

kitne ba-hosh ho gae hum log

KHud-faramosh ho gae hum log

jis ne chaha hamein aziyyat di

aur KHamosh ho gae hum log

dil ki aawaz bhi nahin sunte

kya giran-gosh ho gae hum log

hum ko duniya ne parsa samjha

jab KHata-kosh ho gae hum log

pi gae jhiDkiyan bhi saqi ki

kya bala-nosh ho gae hum log

is tarah pi rahe hain KHun apna

jaise mai-nosh ho gae hum log

shahr mein is qadar the hangame

ghar mein ru-posh ho gae hum log

kitne chehron pe aa gai rangat

jab se KHamosh ho gae hum log

zaKHm pae hain is qadar 'ejaz'

aaj gul-posh ho gae hum log