kitne bosida hain haalat musalmanon ke

kitne bosīda haiñ hālāt musalmānoñ ke

dil dukhāte haiñ yahāñ faisle aivānoñ ke

oḌhnā aur bichhaunā huā daulat un kā

bā.is-e-sharm yahāñ kaam haiñ sultānoñ ke

ye bhī mahbūb kī yādoñ meñ magan hoñ shāyad

shaiḳh jī aap kyoñ dushman hue dīvānoñ ke

sāhab-e-fikr madad-gār mujāhid darvesh

ab to lagtā hai ye kirdār haiñ afsānoñ ke

kāTnā mārnā insān kā sheva to nahīñ

chhoḌ do taur tarīqe haiñ ye haivānoñ ke

bas zarā sī ye ġharībī hai sanam Tal jaa.e

chaak sī leñge sanam apne garebānoñ ke

ham to guftār ke ġhāzī haiñ yahāñ sab 'anjum'

amn ke naam pe bhāge hue maidānoñ ke

kitne bosida hain haalat musalmanon ke

dil dukhate hain yahan faisle aiwanon ke

oDhna aur bichhauna hua daulat un ka

bais-e-sharm yahan kaam hain sultanon ke

ye bhi mahbub ki yaadon mein magan hon shayad

shaiKH ji aap kyon dushman hue diwanon ke

sahab-e-fikr madad-gar mujahid darwesh

ab to lagta hai ye kirdar hain afsanon ke

kaTna marna insan ka shewa to nahin

chhoD do taur tariqe hain ye haiwanon ke

bas zara si ye gharibi hai sanam Tal jae

chaak si lenge sanam apne garebanon ke

hum to guftar ke ghazi hain yahan sab 'anjum'

amn ke nam pe bhage hue maidanon ke