kitne jug bit gae phir bhi na bhula jae

kitne jug biit ga.e phir bhī na bhūlā jaa.e

maiñ jahāñ jā.ūñ mire saath vo chehra jaa.e

raat ab lauT chalī niiñd se jaagā jaa.e

apne kho.e hue sūraj ko pukārā jaa.e

ye damakte hue ruḳhsār chamaktī āñkheñ

zindagī kar chuke ab Duub ke dekhā jaa.e

ab ke tūfān meñ ho jaa.e na reza reza

jism kī TūTtī dīvār ko thāmā jaa.e

mohtasib shahr meñ mīzān liye phirte haiñ

ham gunahgār haiñ is shahr se bhāgā jaa.e

apne hī dil meñ kabhī jhāñk ke dekho mujh ko

maiñ koī raaz nahīñ huuñ jise samjhā jaa.e

le ke shīshe meñ chalo ātish-e-sayyāl 'shamīm'

qāzi-e-shahr ke īmān ko parkhā jaa.e

kitne jug bit gae phir bhi na bhula jae

main jahan jaun mere sath wo chehra jae

raat ab lauT chali nind se jaga jae

apne khoe hue suraj ko pukara jae

ye damakte hue ruKHsar chamakti aankhen

zindagi kar chuke ab Dub ke dekha jae

ab ke tufan mein ho jae na reza reza

jism ki TuTti diwar ko thama jae

mohtasib shahr mein mizan liye phirte hain

hum gunahgar hain is shahr se bhaga jae

apne hi dil mein kabhi jhank ke dekho mujh ko

main koi raaz nahin hun jise samjha jae

le ke shishe mein chalo aatish-e-sayyal 'shamim'

qazi-e-shahr ke iman ko parkha jae