kitne jumle hain ki jo ru-posh hain yaron ke bich

kitne jumle haiñ ki jo rū-posh haiñ yāroñ ke biich

ham bhī mujrim kī tarah ḳhāmosh haiñ yāroñ ke biich

kyā kaheñ kis ne bahāroñ ko ḳhizāñ-sāmāñ kiyā

dekhne meñ to sabhī gul-posh haiñ yāroñ ke biich

ye bhī sach hai ghar ke bhedī ne kiyā ghar ko tabāh

ye bhī lagtā hai ki sab nirdosh haiñ yāroñ ke biich

kyā pata kab ḳhuun kā pyāsā yahāñ ho jaa.e kaun

yuuñ to kahne ko sabhī mai-nosh haiñ yāroñ ke biich

haañ chalā ab sāqiyā jaadū bharī nazroñ ke tiir

ham bhī dekheñ kis qadar zī-hosh haiñ yāroñ ke biich

bazm-e-yārāñ hai ye saaqī mai nahīñ to ġham na kar

kitne haiñ jo mai-kada bar-dosh haiñ yāroñ ke biich

'tarz' paḌhtā hai koī jab jhuum kar nazm o ġhazal

aisā lagtā hai 'firāq' o 'josh' haiñ yāroñ ke biich

kitne jumle hain ki jo ru-posh hain yaron ke bich

hum bhi mujrim ki tarah KHamosh hain yaron ke bich

kya kahen kis ne bahaaron ko KHizan-saman kiya

dekhne mein to sabhi gul-posh hain yaron ke bich

ye bhi sach hai ghar ke bhedi ne kiya ghar ko tabah

ye bhi lagta hai ki sab nirdosh hain yaron ke bich

kya pata kab KHun ka pyasa yahan ho jae kaun

yun to kahne ko sabhi mai-nosh hain yaron ke bich

han chala ab saqiya jadu bhari nazron ke tir

hum bhi dekhen kis qadar zi-hosh hain yaron ke bich

bazm-e-yaran hai ye saqi mai nahin to gham na kar

kitne hain jo mai-kada bar-dosh hain yaron ke bich

'tarz' paDhta hai koi jab jhum kar nazm o ghazal

aisa lagta hai 'firaq' o 'josh' hain yaron ke bich