kitne kanTon se bhari hai ye Dagar jaante hain

kitne kāñToñ se bharī hai ye Dagar jānte haiñ

kaisā mushkil hai mohabbat kā safar jānte haiñ

ab nahīñ dūrī-e-manzil kā koī ḳhauf hameñ

ābla-pā.ī ko sahne kā hunar jānte haiñ

ham ne kab tum ko banāyā hai muhāfiz apnā

kaise karnā hai hameñ apnā safar jānte haiñ

ham ne dekhe haiñ badalte hue duniyā ke chalan

kaise andāz kī hai kis kī nazar jānte haiñ

ye jo tūfāñ hameñ le aate haiñ sāhil kī taraf

ye hai sab maañ kī du'āoñ kā asar jānte haiñ

ham bhī 'tasnīm' rahe shām-o-sahar gardish meñ

apnī rūdād ko ye shams-o-qamar jānte haiñ

kitne kanTon se bhari hai ye Dagar jaante hain

kaisa mushkil hai mohabbat ka safar jaante hain

ab nahin duri-e-manzil ka koi KHauf hamein

aabla-pai ko sahne ka hunar jaante hain

hum ne kab tum ko banaya hai muhafiz apna

kaise karna hai hamein apna safar jaante hain

hum ne dekhe hain badalte hue duniya ke chalan

kaise andaz ki hai kis ki nazar jaante hain

ye jo tufan hamein le aate hain sahil ki taraf

ye hai sab man ki du'aon ka asar jaante hain

hum bhi 'tasnim' rahe sham-o-sahar gardish mein

apni rudad ko ye shams-o-qamar jaante hain