kitni manus-nigahi ke fusun chaunk paDe

kitnī mānūs-nigāhī ke fusūñ chauñk paḌe

us ne begāna adaa.ī se jab irshād kiyā

un kī nazroñ meñ hamīñ jaur ke qābil Thahre

chāhne vāloñ ko hī kushta-e-bedād kiyā

yaad ik TuuTe ta'alluq kī dilāne ke liye

bhūlī-bisrī huī yādoñ ne hameñ yaad kiyā

dil bhī kyā shoḳh-tabī.at hai ki sapnoñ kā nagar

abhī basne bhī na paayā thā ki barbād kiyā

ghuT ke marne ke salīqe bhī sikhā.e hote

dil-figāroñ ko asīrī se to āzād kiyā

ham ne to ghar meñ bhī dekhī na sukūñ kī sūrat

'ġhālib'-e-ḳhasta ne kyoñ dasht meñ ghar yaad kiyā

kaisī uftād paḌī shahr-e-tamannā pe 'rishī'

jis ne ābād kiyā us ne hī barbād kiyā

kitni manus-nigahi ke fusun chaunk paDe

us ne begana adai se jab irshad kiya

un ki nazron mein hamin jaur ke qabil Thahre

chahne walon ko hi kushta-e-bedad kiya

yaad ek TuTe ta'alluq ki dilane ke liye

bhuli-bisri hui yaadon ne hamein yaad kiya

dil bhi kya shoKH-tabiat hai ki sapnon ka nagar

abhi basne bhi na paya tha ki barbaad kiya

ghuT ke marne ke saliqe bhi sikhae hote

dil-figaron ko asiri se to aazad kiya

hum ne to ghar mein bhi dekhi na sukun ki surat

'ghaalib'-e-KHasta ne kyon dasht mein ghar yaad kiya

kaisi uftad paDi shahr-e-tamanna pe 'rishi'

jis ne aabaad kiya us ne hi barbaad kiya