kitni shiddat se tujhe chaha tha

kitnī shiddat se tujhe chāhā thā

kabhī kuchh aur nahīñ sochā thā

kho.e the aise tirī chāhat meñ

TuuT ke abr-e-junūñ barsā thā

merī har soch meñ thī terī hī soch

merā har lamha tirā lamha thā

jab bhī paḌte the ḳhayāloñ ke bhañvar

terā chehra hī ubhar aatā thā

un dinoñ jism kī rag rag meñ ravāñ

ḳhuuñ kahāñ ḳhvāhishoñ kā dariyā thā

yaad hai aaj bhī sāñsoñ kī mahak

vaqt apne liye ruk jaatā thā

jab chamaktā thā badan kā sūraj

dhuup ban kar maiñ bikhar jaatā thā

TuuT jaatā thā zamānoñ kā sukūt

daf.atan shaam ko phone aatā thā

rañg-e-pairāhan-e-ehsās thī tū

maiñ nigāh-e-talab-e-tishna thā

tū nasīm-e-sahar mausam-e-gul

maiñ ki ik TuuTā huā pattā thā

reza reza huā qasr-e-pindār

be-tarah zor-e-badan TuuTā thā

vaar dī aaj tire dar pe anā

bojh sadiyoñ se uThā rakkhā thā

rāheñ bāñheñ to darīche āñkheñ

ye tirā shahr bhī tujh jaisā thā

umr-bhar apne hī sho.aloñ meñ jalā

maiñ ki sūraj kī tarah tanhā thā

garm haiñ rañg ke bāzār yahāñ

itnā sannāTā kahāñ hotā thā

paañv nīche se zamīñ bhī niklī

maiñ ḳhalāoñ kī taraf lapkā thā

sub.h kī tarah vo be-rañg hai ab

'shām' kī tarah jise chāhā thā

kitni shiddat se tujhe chaha tha

kabhi kuchh aur nahin socha tha

khoe the aise teri chahat mein

TuT ke abr-e-junun barsa tha

meri har soch mein thi teri hi soch

mera har lamha tera lamha tha

jab bhi paDte the KHayalon ke bhanwar

tera chehra hi ubhar aata tha

un dinon jism ki rag rag mein rawan

KHun kahan KHwahishon ka dariya tha

yaad hai aaj bhi sanson ki mahak

waqt apne liye ruk jata tha

jab chamakta tha badan ka suraj

dhup ban kar main bikhar jata tha

TuT jata tha zamanon ka sukut

dafatan sham ko phone aata tha

rang-e-pairahan-e-ehsas thi tu

main nigah-e-talab-e-tishna tha

tu nasim-e-sahar mausam-e-gul

main ki ek TuTa hua patta tha

reza reza hua qasr-e-pindar

be-tarah zor-e-badan TuTa tha

war di aaj tere dar pe ana

bojh sadiyon se uTha rakkha tha

rahen banhen to dariche aankhen

ye tera shahr bhi tujh jaisa tha

umr-bhar apne hi shoalon mein jala

main ki suraj ki tarah tanha tha

garm hain rang ke bazar yahan

itna sannaTa kahan hota tha

panw niche se zamin bhi nikli

main KHalaon ki taraf lapka tha

subh ki tarah wo be-rang hai ab

'sham' ki tarah jise chaha tha