kitnon ne baisakhi thami kitne kandhe Tut gae

kitnoñ ne baisākhī thāmī kitne kāñdhe Tuut ga.e

shohrat ke is bojh ko Dho kar achchhe achchhe Tuut ga.e

har dushman ko samjhātā huuñ mujh se baġhāvat Thiik nahīñ

patthar se Takrā kar jaane kitne shīshe Tuut ga.e

vaqt kī āñdhī meñ kuchh ham ne aise peḌ bhī dekhe haiñ

vo jin kī ummīd nahīñ thī vaqt se pahle Tuut ga.e

vo ma.asūm sī paglī laḌkī bin biyāhe ghar baiThī hai

ik ġhurbat kī ḳhātir ab tak chhappan rishte Tuut ga.e

tū apne is husn pe itnā naaz na kar sun husn ke but

ek buḌhāpe kī Thokar meñ lākhoñ putle Tuut ga.e

ham se pūchho pahuñche haiñ ham kaise kaise manzil tak

talvoñ ke andar chubh chubh kar kitne kāñTe Tuut ga.e

ishq vafā ummīdeñ chāhat nisbat qurbat ai 'anupan'

ham se to bachpan meñ hī ye saare khilaune Tuut ga.e

kitnon ne baisakhi thami kitne kandhe Tut gae

shohrat ke is bojh ko Dho kar achchhe achchhe Tut gae

har dushman ko samjhata hun mujh se baghawat Thik nahin

patthar se Takra kar jaane kitne shishe Tut gae

waqt ki aandhi mein kuchh hum ne aise peD bhi dekhe hain

wo jin ki ummid nahin thi waqt se pahle Tut gae

wo masum si pagli laDki bin biyahe ghar baiThi hai

ek ghurbat ki KHatir ab tak chhappan rishte Tut gae

tu apne is husn pe itna naz na kar sun husn ke but

ek buDhape ki Thokar mein lakhon putle Tut gae

hum se puchho pahunche hain hum kaise kaise manzil tak

talwon ke andar chubh chubh kar kitne kanTe Tut gae

ishq wafa ummiden chahat nisbat qurbat ai 'anupan'

hum se to bachpan mein hi ye sare khilaune Tut gae