kiya ishq-e-majazi ne haqiqat aashna mujhko

kiyā ishq-e-majāzī ne haqīqat āshnā mujh ko

butoñ ne zulm vo Dhāyā ki yaad aaya ḳhudā mujh ko

duā jab dil ne kī kar de ḳhudā be-mudda.ā mujh ko

duā-e-be-asar ne haath uThā kar dī duā mujh ko

na rakhnā thā kahīñ kā bhī na rakkhā zauq-e-hastī ne

tamāshā karnā thā āḳhir tamāshā kar diyā mujh ko

na mujh se kaam duniyā ko na mere kaam kī duniyā

dil-e-nākām tū ne rakkhā ye kis kaam kā mujh ko

bahut kartā hai vaa.iz guftugū jannat kī dozaḳh kī

kahāñ pahuñchātā hai dekhūñ to ye pahuñchā huā mujh ko

azāb-e-zindagī āḳhir azāb-e-āḳhirat niklā

hazāroñ baar mar-mar ke yahāñ jiinā paḌā mujh ko

fazā himmat-shikan hai 'ḳhizr' to dil hausla-afzā

batā.eñge kahāñ tak ahl-e-fan bhī rāsta mujh ko

kiya ishq-e-majazi ne haqiqat aashna mujh ko

buton ne zulm wo Dhaya ki yaad aaya KHuda mujh ko

dua jab dil ne ki kar de KHuda be-muddaa mujh ko

dua-e-be-asar ne hath uTha kar di dua mujh ko

na rakhna tha kahin ka bhi na rakkha zauq-e-hasti ne

tamasha karna tha aaKHir tamasha kar diya mujh ko

na mujh se kaam duniya ko na mere kaam ki duniya

dil-e-nakaam tu ne rakkha ye kis kaam ka mujh ko

bahut karta hai waiz guftugu jannat ki dozaKH ki

kahan pahunchata hai dekhun to ye pahuncha hua mujh ko

azab-e-zindagi aaKHir azab-e-aKHirat nikla

hazaron bar mar-mar ke yahan jina paDa mujh ko

faza himmat-shikan hai 'KHizr' to dil hausla-afza

bataenge kahan tak ahl-e-fan bhi rasta mujh ko