kiya jazb-e-dil ne asar jate jate

kiyā jazb-e-dil ne asar jaate jaate

vo vāpas chale aa.e ghar jaate jaate

raqīboñ se raste meñ bach bach ke chalnā

kahīñ lag na jaa.e nazar jaate jaate

marīz-e-mohabbat pe rahmat ḳhudā kī

ye kyā kah gayā chārāgar jaate jaate

ye rindoñ kī duniyā ye mai-ḳhāna zāhid

kahāñ aa ga.e aap ghar jaate jaate

jahāñ meñ na āḳhir kahīñ ke rahe tum

idhar aate aate udhar jaate jaate

na ḳhud aaya aur na ḳhabar koī aa.ī

kahāñ mar gayā nāma-bar jaate jaate

marīz-e-mohabbat ko taḌpā ke maarā

hue mehrbāñ vo magar jaate jaate

kahāñ 'ja.afarī' ab vo pahlī sī dillī

jo aaya lagā.ī nazar jaate jaate

kiya jazb-e-dil ne asar jate jate

wo wapas chale aae ghar jate jate

raqibon se raste mein bach bach ke chalna

kahin lag na jae nazar jate jate

mariz-e-mohabbat pe rahmat KHuda ki

ye kya kah gaya chaaragar jate jate

ye rindon ki duniya ye mai-KHana zahid

kahan aa gae aap ghar jate jate

jahan mein na aaKHir kahin ke rahe tum

idhar aate aate udhar jate jate

na KHud aaya aur na KHabar koi aai

kahan mar gaya nama-bar jate jate

mariz-e-mohabbat ko taDpa ke mara

hue mehrban wo magar jate jate

kahan 'jafari' ab wo pahli si dilli

jo aaya lagai nazar jate jate