kiya tha zabt ka dawa magar nibha na sake

kiyā thā zabt kā da.avā magar nibhā na sake

ham apne dil kī lagī dil-lagī banā na sake

pahuñch ke bazm meñ yuuñ ro.e ham ki gā na sake

ġhazal to le ke ga.e the magar sunā na sake

vo lambī Dāliyāñ sarsoñ kī phuul sarsoñ ke

jab aa.e gaañv se barsoñ unheñ bhulā na sake

kisī kī bazm kā manzar jo dekh aa.ī huuñ

unheñ maiñ kaise dikhā.ūñ jo log jā na sake

na hañsiye ham pe ki ham to haiñ choT khaa.e hue

unhīñ pe roiye jo log choT khā na sake

ajiib husn hai terā ki ham tirī tasvīr

banānā chaah rahe the magar banā na sake

vo ek sub.h ko aa.ī thī ratjagoñ ke baad

phir us ke baad koī ratjagā manā na sake

jab us ne pūchhā ki kaisā mizāj hai 'anjum'

jigar meñ dard vo uTThā ki ham batā na sake

kiya tha zabt ka dawa magar nibha na sake

hum apne dil ki lagi dil-lagi bana na sake

pahunch ke bazm mein yun roe hum ki ga na sake

ghazal to le ke gae the magar suna na sake

wo lambi Daliyan sarson ki phul sarson ke

jab aae ganw se barson unhen bhula na sake

kisi ki bazm ka manzar jo dekh aai hun

unhen main kaise dikhaun jo log ja na sake

na hansiye hum pe ki hum to hain choT khae hue

unhin pe roiye jo log choT kha na sake

ajib husn hai tera ki hum teri taswir

banana chah rahe the magar bana na sake

wo ek subh ko aai thi ratjagon ke baad

phir us ke baad koi ratjaga mana na sake

jab us ne puchha ki kaisa mizaj hai 'anjum'

jigar mein dard wo uTTha ki hum bata na sake