kiye aarzu se paiman jo maal tak na pahunche

kiye aarzū se paimāñ jo ma.aal tak na pahuñche

shab-o-roz-e-āshnā.ī mah o saal tak na pahuñche

vo nazar baham na pahuñchī ki muhīt-e-husn karte

tirī diid ke vasīle ḳhad-o-ḳhāl tak na pahuñche

vahī chashma-e-baqā thā jise sab sarāb samjhe

vahī ḳhvāb mo'tabar the jo ḳhayāl tak na pahuñche

tirā lutf vaj.h-e-taskīñ na qarār sharh-e-ġham se

ki haiñ dil meñ vo gile bhī jo malāl tak na pahuñche

koī yaar jaañ se guzrā koī hosh se na guzrā

ye nadīm-e-yak-do-sāġhar mire haal tak na pahuñche

chalo 'faiz' dil jalā.eñ kareñ phir se arz-e-jānāñ

vo suḳhan jo lab tak aa.e pe savāl tak na pahuñche

kiye aarzu se paiman jo maal tak na pahunche

shab-o-roz-e-ashnai mah o sal tak na pahunche

wo nazar baham na pahunchi ki muhit-e-husn karte

teri did ke wasile KHad-o-KHal tak na pahunche

wahi chashma-e-baqa tha jise sab sarab samjhe

wahi KHwab mo'tabar the jo KHayal tak na pahunche

tera lutf wajh-e-taskin na qarar sharh-e-gham se

ki hain dil mein wo gile bhi jo malal tak na pahunche

koi yar jaan se guzra koi hosh se na guzra

ye nadim-e-yak-do-saghar mere haal tak na pahunche

chalo 'faiz' dil jalaen karen phir se arz-e-jaanan

wo suKHan jo lab tak aae pe sawal tak na pahunche