kohkan aashiq raha na qais diwana raha

kohkan āshiq rahā na qais dīvāna rahā

ab zabān-zad-ḳhalq to apnā hī afsāna rahā

dekh kar kahte haiñ sab abrū o chashm-e-mast-e-yār

kyūñki mehrāb-e-haram ke nīche mai-ḳhāna rahā

kis tarah se ye nagar ai ham-nafas ābād ho

barsoñ shahr-e-dil pe jaish-e-ishq kā thāna rahā

nit rahe vābasta-e-zanjīr-e-zulf-e-mahvishāñ

firqa ushshāq meñ apnā yahī baanā rahā

garche ḳhvāb-o-ḳhur se hijrāñ meñ hue fāriġh vale

shab kī bedārī rahī aur un ko ġham khānā rahā

tāqat-o-sabr-o-ḳhirad to de chuke kab ke javāb

hijr meñ ab ek baaqī ham ko mar jaanā rahā

dil ulajhtā hai mirā jaldī batā mashshāta aaj

der tak zulfoñ meñ us kī kis liye shāna rahā

ham to aql-o-hosh ke 'nāmī' ke qaa.il haiñ ki ye

umr bhar husn-e-parī-rūoñ kā dīvāna rahā

kohkan aashiq raha na qais diwana raha

ab zaban-zad-KHalq to apna hi afsana raha

dekh kar kahte hain sab abru o chashm-e-mast-e-yar

kyunki mehrab-e-haram ke niche mai-KHana raha

kis tarah se ye nagar ai ham-nafas aabaad ho

barson shahr-e-dil pe jaish-e-ishq ka thana raha

nit rahe wabasta-e-zanjir-e-zulf-e-mahwishan

firqa ushshaq mein apna yahi bana raha

garche KHwab-o-KHur se hijran mein hue farigh wale

shab ki bedari rahi aur un ko gham khana raha

taqat-o-sabr-o-KHirad to de chuke kab ke jawab

hijr mein ab ek baqi hum ko mar jaana raha

dil ulajhta hai mera jaldi bata mashshata aaj

der tak zulfon mein us ki kis liye shana raha

hum to aql-o-hosh ke 'nami' ke qail hain ki ye

umr bhar husn-e-pari-ruon ka diwana raha