kohsar to kahin pe samundar bhi aaenge

kohsār to kahīñ pe samundar bhī ā.eñge

apnī talāsh meñ na.e manzar bhī ā.eñge

pāmāl rāstoñ se baġhāvat nahīñ gunāh

qadreñ na.ī haiñ to na.e rahbar bhī ā.eñge

sūrat meñ rang-o-nūr kii, phūloñ kii, ham kahīñ

lauh-e-jahāñ pe harf-e-mukarrar bhī ā.eñge

nāzuk-mizāj dete haiñ har lamha imtihāñ

shīshoñ se jism ke liye patthar bhī ā.eñge

jab jab baḌhegī zulmat-e-ġhārat-gar-e-yaqīñ

āvāz-e-haq pe kaTne na.e sar bhī ā.eñge

badle haiñ husn-o-ishq to aqdār bhī na.ī

le kar na.e javāz sitamgar bhī ā.eñge

mahrūmiyāñ kahīñ to kahīñ par navāzisheñ

kyā ye savāl bar-sar-e-mahshar bhī ā.eñge

aa.e ho shahr-e-zar kī chakā-chauñd meñ magar

mahloñ ke saath raah meñ be-ghar bhī ā.eñge

māyūs ho ke johd-e-musalsal na chhoḌnā

zaḳhmoñ ke baa'd hāthoñ meñ gauhar bhī ā.eñge

haiñ pattharoñ se log hī is shahr-e-sang meñ

kyā un ke vāste na.e manzar bhī ā.eñge

devī ko munsifī kī milegā qarār tab

jab apnā sar jhukā.e sitamgar bhī ā.eñge

'ḳhālid' tirā vajūd gavārā nahīñ jinheñ

bazm-e-suḳhan meñ kyā vo suḳhanvar bhī ā.eñge

kohsar to kahin pe samundar bhi aaenge

apni talash mein nae manzar bhi aaenge

pamal raston se baghawat nahin gunah

qadren nai hain to nae rahbar bhi aaenge

surat mein rang-o-nur ki, phulon ki, hum kahin

lauh-e-jahan pe harf-e-mukarrar bhi aaenge

nazuk-mizaj dete hain har lamha imtihan

shishon se jism ke liye patthar bhi aaenge

jab jab baDhegi zulmat-e-ghaarat-gar-e-yaqin

aawaz-e-haq pe kaTne nae sar bhi aaenge

badle hain husn-o-ishq to aqdar bhi nai

le kar nae jawaz sitamgar bhi aaenge

mahrumiyan kahin to kahin par nawazishen

kya ye sawal bar-sar-e-mahshar bhi aaenge

aae ho shahr-e-zar ki chaka-chaund mein magar

mahlon ke sath rah mein be-ghar bhi aaenge

mayus ho ke johd-e-musalsal na chhoDna

zaKHmon ke ba'd hathon mein gauhar bhi aaenge

hain pattharon se log hi is shahr-e-sang mein

kya un ke waste nae manzar bhi aaenge

dewi ko munsifi ki milega qarar tab

jab apna sar jhukae sitamgar bhi aaenge

'KHalid' tera wajud gawara nahin jinhen

bazm-e-suKHan mein kya wo suKHanwar bhi aaenge