koi aa kar nahin jata dilon ke aashiyanon se

koī aa kar nahīñ jaatā diloñ ke āshiyānoñ se

rihā.ī kā koī rasta nahīñ in qaid-ḳhānoñ se

machhere kashtiyoñ meñ baiTh kar ke gā rahe haiñ giit

havā.eñ muskurā kar mil rahī haiñ bādbānoñ se

zamīñ vāloñ ne jab se āsmāñ kī or dekhā hai

parinde ḳhauf khāne lag ga.e ūñchī uḌānoñ se

ye sūkhe zaḳhm haiñ yā rang haiñ tasvīr maazī ke

mujhe guzre zamāne yaad aa.e in nishānoñ se

hameñ apnī laḌā.ī is zamīñ par ḳhud hī laḌnī hai

farishte to nahīñ aane yahāñ par āsmānoñ se

tumhārā dil yahāñ par kho gayā to kaisī hairat hai

barelī meñ to jhumke tak nikal jaate haiñ kānoñ se

koi aa kar nahin jata dilon ke aashiyanon se

rihai ka koi rasta nahin in qaid-KHanon se

machhere kashtiyon mein baiTh kar ke ga rahe hain git

hawaen muskura kar mil rahi hain baadbanon se

zamin walon ne jab se aasman ki or dekha hai

parinde KHauf khane lag gae unchi uDanon se

ye sukhe zaKHm hain ya rang hain taswir mazi ke

mujhe guzre zamane yaad aae in nishanon se

hamein apni laDai is zamin par KHud hi laDni hai

farishte to nahin aane yahan par aasmanon se

tumhaara dil yahan par kho gaya to kaisi hairat hai

bareli mein to jhumke tak nikal jate hain kanon se