koi aawaz na aahaT na KHayal aise mein

koī āvāz na aahaT na ḳhayāl aise meñ

raat mahkī hai magar jī hai niDhāl aise meñ

mere atrāf to girtī huī dīvāreñ haiñ

sāya-e-umr-e-ravāñ mujh ko sambhāl aise meñ

jab bhī chaḌhte hue dariyā meñ safīna utrā

yaad aayā tire lahje kā kamāl aise meñ

aañkh khultī hai to sab ḳhvāb bikhar jaate haiñ

sochtā huuñ ki bichhā duuñ koī jaal aise meñ

muddatoñ ba.ad agar sāmne aa.e ham tum

dhuñdle dhuñdle se mileñge ḳhad-o-ḳhāl aise meñ

hijr ke phuul meñ hai dard kī baasī ḳhushbū

mausam-e-vasl koī taaza malāl aise meñ

koi aawaz na aahaT na KHayal aise mein

raat mahki hai magar ji hai niDhaal aise mein

mere atraf to girti hui diwaren hain

saya-e-umr-e-rawan mujh ko sambhaal aise mein

jab bhi chaDhte hue dariya mein safina utra

yaad aaya tere lahje ka kamal aise mein

aankh khulti hai to sab KHwab bikhar jate hain

sochta hun ki bichha dun koi jal aise mein

muddaton baad agar samne aae hum tum

dhundle dhundle se milenge KHad-o-KHal aise mein

hijr ke phul mein hai dard ki basi KHushbu

mausam-e-wasl koi taza malal aise mein