koi achchha nahin hota hai bari chaalon se

koī achchhā nahīñ hotā hai barī chāloñ se

lab-e-bām aa ke khaḌe ho na khule bāloñ se

roz-o-shab kis liye rahtā huuñ ilāhī betāb

na to goroñ se mohabbat na mujhe kāloñ se

josh-e-vahshat meñ jo jañgal kī taraf jā niklā

tap chaḌhī sher-e-niyastāñ ko mire nāloñ se

koī kuchh ishq kā kartā hai bayāñ koī kuchh

tañg aayā huuñ maiñ is qaziya ke dallāloñ se

beshtar sub.h-e-shab-e-vasl se ham guzreñge

zor-e-adbār chalegā na ḳhush-iqbāloñ se

mast hāthī hai tirī chashm-e-siyah mast ai yaar

saf-e-mizhgāñ use ghere hue hai bhāloñ se

rū-e-ḳhūbāñ se milegā hameñ bosa ki nahīñ

haal in shakloñ kā kuchh pūchhiye rammāloñ se

aarzī husn se nafrat ye huī hai dil ko

rutba zulfoñ ko nahīñ makḌiyoñ ke jāloñ se

ḳhat-e-shab-gūñ ne nikal kar abas andher kiyā

kāfiristāñ to vo ruḳh aage hī thā ḳhāloñ se

do jahāñ hashr ke din hoveñge bāham maujūd

muttafiq hoñge idhar vaale udhar vāloñ se

dil hasīnoñ ke tasavvur se banāyā ḳhālī

ā.īna-ḳhānoñ meñ kasrat rahī timsāloñ se

kuchh to halkā kareñ ḳhār-e-rah sahrā-e-junūñ

bojh lañgar kā hue haiñ kaf-e-pā chhāloñ se

in ke bosoñ kī tamannā hai laboñ ko 'ātish'

aa.ina kasb-e-safā karte haiñ jin gāloñ se

koi achchha nahin hota hai bari chaalon se

lab-e-baam aa ke khaDe ho na khule baalon se

roz-o-shab kis liye rahta hun ilahi betab

na to goron se mohabbat na mujhe kalon se

josh-e-wahshat mein jo jangal ki taraf ja nikla

tap chaDhi sher-e-niyastan ko mere nalon se

koi kuchh ishq ka karta hai bayan koi kuchh

tang aaya hun main is qaziya ke dallalon se

beshtar subh-e-shab-e-wasl se hum guzrenge

zor-e-adbar chalega na KHush-iqbaalon se

mast hathi hai teri chashm-e-siyah mast ai yar

saf-e-mizhgan use ghere hue hai bhaalon se

ru-e-KHuban se milega hamein bosa ki nahin

haal in shaklon ka kuchh puchhiye rammalon se

aarzi husn se nafrat ye hui hai dil ko

rutba zulfon ko nahin makDiyon ke jalon se

KHat-e-shab-gun ne nikal kar abas andher kiya

kafiristan to wo ruKH aage hi tha KHalon se

do jahan hashr ke din howenge baham maujud

muttafiq honge idhar wale udhar walon se

dil hasinon ke tasawwur se banaya KHali

aaina-KHanon mein kasrat rahi timsalon se

kuchh to halka karen KHar-e-rah sahra-e-junun

bojh langar ka hue hain kaf-e-pa chhaalon se

in ke boson ki tamanna hai labon ko 'atish'

aaina kasb-e-safa karte hain jin galon se