koi batlae ki kya hain yaro

koī batlā.e ki kyā haiñ yaaro

ham bagūle ki havā haiñ yaaro

tañg hai vus.at-e-sahrā-e-junūñ

valvale dil ke sivā haiñ yaaro

sard-o-be-rañg hai zarra zarra

garmī-e-rañg-e-sadā haiñ yaaro

shabnamistān-e-gul-e-naġhma meñ

nik.hat-e-sub.h-e-vafā haiñ yaaro

jalne vāloñ ke jigar haiñ dil haiñ

khilne vāloñ kī adā haiñ yaaro

jin ke qadmoñ se haiñ gulzār ye dasht

ham vahī ābla-pā haiñ yaaro

koi batlae ki kya hain yaro

hum bagule ki hawa hain yaro

tang hai wusat-e-sahra-e-junun

walwale dil ke siwa hain yaro

sard-o-be-rang hai zarra zarra

garmi-e-rang-e-sada hain yaro

shabnamistan-e-gul-e-naghma mein

nikhat-e-subh-e-wafa hain yaro

jalne walon ke jigar hain dil hain

khilne walon ki ada hain yaro

jin ke qadmon se hain gulzar ye dasht

hum wahi aabla-pa hain yaro