koi batlao ki ye naw kahan Thahregi

koī batlāo ki ye naav kahāñ Thahregī

kab qazā aa.egī kab umr-e-ravāñ Thahregī

zindagī ek haqīqat sahī lekin ai dost

gar yahī haal rahā vahm-o-gumāñ Thahregī

sū-e-jaulāñ-gah-e-hastī nigarāñ hai dekho

ye nazar ab ruḳh-e-sāqī pe kahāñ Thahregī

hai bahut saada ġham-e-dil kā fasāna us par

baar pechīdgī-e-sharh-o-bayāñ Thahregī

shahr-e-dard ek nayā hogā vahāñ par ābād

merī āvāz sar-e-dasht jahāñ Thahregī

dosto maut se apnī ye misālī paikār

bā.is-e-rashk-e-masīhā-nafsāñ Thahregī

jis se haq-goī kī zinda hai rivāyat ai dost

aaj ta.azīr ke qābil vo zabāñ Thahregī

sar-garāñ aaj haiñ 'jābir' se suḳhan ke naqqād

kal ko me.ār-e-ġhazal us kī fuġhāñ Thahregī

koi batlao ki ye naw kahan Thahregi

kab qaza aaegi kab umr-e-rawan Thahregi

zindagi ek haqiqat sahi lekin ai dost

gar yahi haal raha wahm-o-guman Thahregi

su-e-jaulan-gah-e-hasti nigaran hai dekho

ye nazar ab ruKH-e-saqi pe kahan Thahregi

hai bahut sada gham-e-dil ka fasana us par

bar pechidgi-e-sharh-o-bayan Thahregi

shahr-e-dard ek naya hoga wahan par aabaad

meri aawaz sar-e-dasht jahan Thahregi

dosto maut se apni ye misali paikar

bais-e-rashk-e-masiha-nafsan Thahregi

jis se haq-goi ki zinda hai riwayat ai dost

aaj tazir ke qabil wo zaban Thahregi

sar-garan aaj hain 'jabir' se suKHan ke naqqad

kal ko mear-e-ghazal us ki fughan Thahregi