koi bhi uqda-kusha-e-KHud-agahi na mila

koī bhī uqda-kushā-e-ḳhud-āgahī na milā

maiñ apne aap se bhī aaj tak kabhī na milā

mushāhidāt pe qudrat na tajrabāt pe naaz

hameñ to koī hunar tujh se zindagī na milā

shu.ūr-e-rāhbarī raah dekhtā kab tak

us aadmī kī jise zauq-e-rah-ravī na milā

dayār-e-shauq meñ sab kuchh mujhe nazar aaya

magar gayā thā maiñ jis ke liye vahī na milā

baḌā ajiib hai mahrūmiyoñ kā rishta bhī

koī bhī shaḳhs kahīñ mujh ko ajnabī na milā

batā.eñ kyā tumheñ us qāfile ke baare meñ

ki ham ko raah meñ jis kā ġhubār bhī na milā

'rabāb' apne hī chehre pe jam ga.iiñ nazreñ

jab ā.inoñ meñ koī aur aks hī na milā

koi bhi uqda-kusha-e-KHud-agahi na mila

main apne aap se bhi aaj tak kabhi na mila

mushahidat pe qudrat na tajrabaat pe naz

hamein to koi hunar tujh se zindagi na mila

shuur-e-rahbari rah dekhta kab tak

us aadmi ki jise zauq-e-rah-rawi na mila

dayar-e-shauq mein sab kuchh mujhe nazar aaya

magar gaya tha main jis ke liye wahi na mila

baDa ajib hai mahrumiyon ka rishta bhi

koi bhi shaKHs kahin mujh ko ajnabi na mila

bataen kya tumhein us qafile ke bare mein

ki hum ko rah mein jis ka ghubar bhi na mila

'rabab' apne hi chehre pe jam gain nazren

jab aainon mein koi aur aks hi na mila