koi chehra jo mere samne laya hai mujhe

koī chehra jo mire sāmne laayā hai mujhe

yahī har haal meñ kyā dekhtā aayā hai mujhe

sa'ī ye thī kisī kandhe pe khaḌā ho jā.ūñ

bhaag niklā huuñ ki har ik ne girāyā hai mujhe

na kabhī baat huī us se na pahchān kabhī

hai magar koī yahāñ tak vahī laayā hai mujhe

muntazir jo bhī the ye kah ke lapak nikle haiñ

ye jo aayā hai bulāvā faqat aayā hai mujhe

bāhar aatā huuñ to uThtī hai mujhī par har aañkh

jaane kis ḳhauf ne is ghar meñ basāyā hai mujhe

ek hī lamhe meñ suntā huuñ maiñ do āvāzeñ

yaad ye kis ne kiyā kis ne bulāyā hai mujhe

haañ ye sach hai ki ba-sad jabr maiñ ghar lauTā huuñ

kis ne is haal meñ lekin kahīñ paayā hai mujhe

'talḳh' maiñ ne jo laḌī jang laḌī phir kis se

apne kandhoñ pe sabhī ne to uThāyā hai mujhe

koi chehra jo mere samne laya hai mujhe

yahi har haal mein kya dekhta aaya hai mujhe

sa'i ye thi kisi kandhe pe khaDa ho jaun

bhag nikla hun ki har ek ne giraya hai mujhe

na kabhi baat hui us se na pahchan kabhi

hai magar koi yahan tak wahi laya hai mujhe

muntazir jo bhi the ye kah ke lapak nikle hain

ye jo aaya hai bulawa faqat aaya hai mujhe

bahar aata hun to uThti hai mujhi par har aankh

jaane kis KHauf ne is ghar mein basaya hai mujhe

ek hi lamhe mein sunta hun main do aawazen

yaad ye kis ne kiya kis ne bulaya hai mujhe

han ye sach hai ki ba-sad jabr main ghar lauTa hun

kis ne is haal mein lekin kahin paya hai mujhe

'talKH' main ne jo laDi jang laDi phir kis se

apne kandhon pe sabhi ne to uThaya hai mujhe