koi dam un ko nigahon ka ishaara na mila

koī dam un ko nigāhoñ kā ishāra na milā

zindagī bhar hameñ jiine kā sahārā na milā

log kahte haiñ gulistāñ meñ bahār aa.ī hai

maiñ ye kahtā huuñ mujhe dard kā chārā na milā

ham-nashīñ kyoñ na kareñ gardish-e-daurāñ ko salām

ham sā koī hameñ taqdīr kā maarā na milā

tere jalvoñ kā bharam khol hī detā lekin

chashm-e-bīnā to milī zauq-e-nazāra na milā

ham ne dekhā to har ik zarre meñ paayā tum ko

aur DhūñDā to kahīñ saaya tumhārā na milā

kyā kaheñ zulf sañvārī thī kisī ne hamdam

raat gardūñ pe mujhe ek bhī taara na milā

umr āḳhir huī mañjdhār meñ apnī 'muḳhtār'

aaj tak bahr-e-mohabbat kā kinārā na milā

koi dam un ko nigahon ka ishaara na mila

zindagi bhar hamein jine ka sahaara na mila

log kahte hain gulistan mein bahaar aai hai

main ye kahta hun mujhe dard ka chaara na mila

ham-nashin kyon na karen gardish-e-dauran ko salam

hum sa koi hamein taqdir ka mara na mila

tere jalwon ka bharam khol hi deta lekin

chashm-e-bina to mili zauq-e-nazara na mila

hum ne dekha to har ek zarre mein paya tum ko

aur DhunDa to kahin saya tumhaara na mila

kya kahen zulf sanwari thi kisi ne hamdam

raat gardun pe mujhe ek bhi tara na mila

umr aaKHir hui manjdhaar mein apni 'muKHtar'

aaj tak bahr-e-mohabbat ka kinara na mila