koi dekhe to ye andaz satane wala

koī dekhe to ye andāz satāne vaalā

mujh se ġhāfil hai mire ḳhvāb meñ aane vaalā

ba.az auqāt ye dekhā hai tirī galiyoñ meñ

rāsta bhuul gayā raah batāne vaalā

dars-e-ibrat mirā anjām hai duniyā ke liye

ab tirī bātoñ meñ koī nahīñ aane vaalā

gumrahī kā mujhe ehsās dilā detā hai

ba.az auqāt koī Thokareñ khāne vaalā

mīThī mīThī sī mire dil meñ kasak chhoḌ gayā

ḳhalvat-e-zehn meñ chupke se dar aane vaalā

ghar meñ ye jashn-e-charāġhāñ kā samāñ kyā ma.anī

is ḳharābe meñ bhalā kaun hai aane vaalā

apne a.amāl-o-aqā.ed ko parakhte rahiye

ab koī aur payambar nahīñ aane vaalā

kyā kahūñ kaun hai mauzū-e-suḳhan ai 'tāhir'

ek kirdār tarāshā hai fasāne vaalā

koi dekhe to ye andaz satane wala

mujh se ghafil hai mere KHwab mein aane wala

baz auqat ye dekha hai teri galiyon mein

rasta bhul gaya rah batane wala

dars-e-ibrat mera anjam hai duniya ke liye

ab teri baaton mein koi nahin aane wala

gumrahi ka mujhe ehsas dila deta hai

baz auqat koi Thokaren khane wala

miThi miThi si mere dil mein kasak chhoD gaya

KHalwat-e-zehn mein chupke se dar aane wala

ghar mein ye jashn-e-charaghan ka saman kya mani

is KHarabe mein bhala kaun hai aane wala

apne aamal-o-aqaed ko parakhte rahiye

ab koi aur payambar nahin aane wala

kya kahun kaun hai mauzu-e-suKHan ai 'tahir'

ek kirdar tarasha hai fasane wala