koī dil-jūī nahīñ thī koī shunavā.ī na thī
jaise ahl-e-shahr se merī shanāsā.ī na thī
mujh ko ik chup-chāp se chehre ne zaḳhmī kar diyā
maiñ ne aisī choT saarī zindagī khaa.ī na thī
ġhaur se dekheñ to hai yādoñ ke rañgoñ kā kamāl
is qadar dilkash kabhī tasvīr-e-tanhā.ī na thī
kar diyā jis ne mujhe phir zindagī se ham-kanār
thā mirā zauq-e-yaqīñ terī masīhā.ī na thī
bāġhbāñ kī ik zarā sī laġhzish-e-tartīb se
mausam-e-gul thā magar gulshan meñ ra.anā.ī na thī
jin se thī insāf kī ummīd ahl-e-dard ko
ġhaur se dekhā to un āñkhoñ meñ bīnā.ī na thī
nā-ḳhudā mujh ko apāhij kar gayā varna 'asad'
āsmāñ ūñchā na thā dariyā meñ gahrā.ī na thī
koi dil-jui nahin thi koi shunawai na thi
jaise ahl-e-shahr se meri shanasai na thi
mujh ko ek chup-chap se chehre ne zaKHmi kar diya
main ne aisi choT sari zindagi khai na thi
ghaur se dekhen to hai yaadon ke rangon ka kamal
is qadar dilkash kabhi taswir-e-tanhai na thi
kar diya jis ne mujhe phir zindagi se ham-kanar
tha mera zauq-e-yaqin teri masihai na thi
baghban ki ek zara si laghzish-e-tartib se
mausam-e-gul tha magar gulshan mein ranai na thi
jin se thi insaf ki ummid ahl-e-dard ko
ghaur se dekha to un aankhon mein binai na thi
na-KHuda mujh ko apahij kar gaya warna 'asad'
aasman uncha na tha dariya mein gahrai na thi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.