koi din aur baad-e-fana hum yahan

koī din aur bād-e-fanā ham yahāñ

kāTte jaise koī sazā ham yahāñ

saañs kī Dor kamzor hotī huī

tū kahāñ hai batā ai havā ham yahāñ

apnī pahchān ḳhud se chhupā.e hue

pūchhte phir rahe haiñ patā ham yahāñ

rah ga.e ḳhvāb aur un kī halkī kasak

dekhte rah ga.e ratjagā ham yahāñ

ishq ne bārhā ham ko rusvā kiyā

dil ke hāthoñ luTe bārhā ham yahāñ

naqsh thā miT gayā ḳhvāb thā bujh gayā

kyoñ khaḌe haiñ bhalā be-navā ham yahāñ

koi din aur baad-e-fana hum yahan

kaTte jaise koi saza hum yahan

sans ki Dor kamzor hoti hui

tu kahan hai bata ai hawa hum yahan

apni pahchan KHud se chhupae hue

puchhte phir rahe hain pata hum yahan

rah gae KHwab aur un ki halki kasak

dekhte rah gae ratjaga hum yahan

ishq ne barha hum ko ruswa kiya

dil ke hathon luTe barha hum yahan

naqsh tha miT gaya KHwab tha bujh gaya

kyon khaDe hain bhala be-nawa hum yahan